MAPS 2 - Takim me Mikaela Mingën: “Tingulli në teatër, kinema dhe multimedia”

MAPS 2 - Takim me Mikaela Mingën: “Tingulli në teatër, kinema dhe multimedia”

2024-01-19

Më datë 19 janar 2024, u zhvillua takimi i dytë i serisë së takimeve “Harta” te Tulla Culture Centre. Në fokus ishte artikulli i muzikologes, Mikalea Minga, e cila mundësoi një thellim të mëtejshëm në artikullin me titull “Tingulli në teatër, kinema dhe multimedia”.

Në prezantimin e saj, folësja fillimisht paraqiti një peizazh të përgjithshëm të tingullit në artet skenike, duke u ndalur sidomos në postkomunizmin në Shqipëri dhe domethënien që pati komunizmi në zhvillimin e arteve skenike, e për pasojë edhe të muzikës. Në këtë vazhdë, autorja u ndal te problematika e mungesës së hulumtimeve bashkëkohore në zhvillimin e tingullit. Ndërkohë, ajo u ndal dhe tek orvatjet e para, të cilat pasuan me liberalizmin, në interdisiplinaritetin tingull-arte skenike që shënojnë edhe novacionet e para në fushën e kinemasë dhe teatrit shqiptar. Më konkretisht, te kinemaja dhe teatri, duke sjellë edhe rastet specifike të ideuar dhe implementuar nga artistë të ndryshëm, siç mund të jenë: Gentian Shkurti, Ermela Teli, Mardit Lleshi; në fushën e teatrit: Enton Kacaj, Ergys Lubonja, Sesilia Plasari dhe Florian Çanga. Sa i përket këtyre zhvillimeve, folësja theksoi se nxitës ka qenë dëshira e mirë dhe pasioni i individëve dhe artistëve në fjalë, duke i dalluar këto zhvillime si rrjedhojë e punës freelance.

Gjatë takimit pjesëmarrësit patën mundësinë të ndjekin edhe disa nga filmat e përmendur në artikull dhe të marrë si rast studimi, si: Alice in Wonderland (1997), Blackbird, Architecture of Sadness (2012) etj.. Në diskutimet për filmat e shfaqur, u theksua raporti i tingullit me narrativën e filmit, muzika dhe tingulli si motivi i ngjarjeve, tingulli dhe dialogu etj..

Takimi u mbyll me një sesion diskutimi me të pranishmit dhe me disa komente te folëses mbi rëndësinë e krijimit të një arkivi digjital mbi artete pamore dhe multimedian, për të dokumentuar historikun e arteve skenike dhe muzikës në Shqipëri, por edhe për të nxitur në këtë mënyrë dukuri të reja në këto fusha, si dhe procese studimi dhe hulumtimi më të thelluara për një brez të ri artistësh dhe studiuesish. Gjithashtu, u theksua edhe tërheqja e vëmendjes të institucioneve qeveritare, për subvencionimin e nismave jo-tregtare në fushën e arteve skenike dhe të muzikës.

6 2